Татарстан Республикасының М.И. Мәхмүтов исемендәге Дәүләт премиясе Татарстан территориясендә урнашкан белем бирү оешмаларының педагогик хезмәткәрләренә дидактика, педагогик кадрлар әзерләү һәм белем бирү процессына нәтиҗәле технологияләрне гамәлгә кертү өлкәсендә фәнни-методик һәм гамәли казанышлары өчен бирелә.
Ел саен 5 октябрьгә М.И. Мәхмүтов исемендәге йөзәр мең сум күләмендәге ике премия бирелә. Премия педагогларның фәнни һәм фәнни-методик эшчәнлеген стимуллаштыру, күренекле Россия педагогы һәм көнчыгышны өйрәнүче, Татарстан Республикасы Фәннәр Академиясе һәм Россия мәгариф академиясе академигы, Россия Федерациясенең атказанган фән эшлеклесе Мирза Мәхмүтов истәлеген мәңгеләштерү өчен билгеләнгән.
4 октябрьдә Татарстан Президенты Рөстәм Миңнеханов Мирза Мәхмүтов исемендәге Татарстан Республикасы Дәүләт премиясенә конкурста җиңүчеләрне тантаналы рәвештә котлады:
- Казан (Идел буе) федераль университеты Психология һәм мәгариф институты югары мәктәбенең Педагогика кафедрасы мөдире, педагогика фәннәре докторы Мәсәлимова Әлфия Рәфис кызы
- Казан (Идел буе) федераль университеты Н.И.Лобачевский исемендәге лицее директоры, педагогика фәннәре кандидаты Скобельцина Елена Германовна.
Татарстан Республикасы Мәгарифне үстерү институты коллективы конкурста җиңүчеләрне чын күңелдән котлый!
