27-28 ноябрьдә Мәскәүдә Россия Федерациясе халыкларының туган телләре укытучыларының Бөтенроссия съезды булды
Чара Россия Мәгариф министрлыгы ярдәмендә Федераль туган телләр институты тарафыннан оештырылды һәм Мәскәү дәүләт педагогика университеты базасында үткәрелде.
Съезд 300дән артык һөнәри берләшмә вәкилләрен: укытучыларны, педагогик югары уку йортлары һәм көллиятләр укытучыларын, тикшеренүчеләрне, методистларны, шулай ук хакимият органнары һәм иҗтимагый оешмалар вәкилләрен берләштерде.
Съезд мәйданчыкларында 28 модератор һәм 98 спикер эшләде, алар арасында — 20 фән докторы һәм 40 фән кандидаты.
Катнашучылар гомуми белем бирү системасында телләр күптөрлелеген үстерүнең төп юнәлешләре, белем бирүнең дәвамлылыгы мәсьәләләре һәм полилингваль белем бирүгә заманча алымнар турында фикер алыштылар. Иң яхшы методик практикаларга, инновацион белем бирү технологияләренә һәм укучыларның мәдәни һәм гражданлык үзенчәлеген формалаштыруда педагогларның роленә аерым игътибар бирелде.
Татарстан Республикасыннан зур делегация: ТР Мәгариф һәм фән министрлыгы, ТР Фәннәр академиясе, Казан федераль университеты, ТР нәшриятлары, «Адымнар» полилингваль комплексы вәкилләре, Казан һәм Яр Чаллы педагоглары катнашты.
Съездда ТР Мәгарифне үстерү институтыннан ректор Ногманова Людмила Николаевна, татар теле һәм әдәбияты кафедрасы мөдире Шәмсетдинова Рәсимә Равил кызы, татар теле һәм әдәбияты кафедрасы доценты Фәттахова Рүзилә Фәрдәвис кызы катнашты. Алар тематик мәйданчыкларда чыгыш ясадылар һәм Татарстан Республикасында милли мәгариф өлкәсендә һөнәри тәҗрибә уртаклаштылар, гомуми белем бирү системасында телләр күптөрлелеген үстерүнең төп юнәлешләре, белем бирүнең дәвамлылыгы мәсьәләләре һәм полилингваль белем бирүгә заманча алымнар турында фикер алыштылар.
Съезд кысаларында катнашучылар «Туган телләрне укытуда инновацияләр: теориядән практикага» күргәзмәсе белән таныштылар, анда Россия төбәкләренең заманча методикалары, белем бирү технологияләре һәм авторлык практикалары, анда ТР Мәгарифне үстерү институтының «Сәлам!» дип аталган мөһим проекты да тәкъдим ителгән иде, ул рус телле укучыларны татар теленә өйрәтүгә юнәлдерелгән.
Съезд Россиянең тел һәм мәдәни күптөрлелеген чагылдырган һөнәри диалог һәм бердәм белем бирү киңлеген ныгыту өчен әһәмиятле платформага әверелде.
