Бүген Дәүләт Советында шәһәр һәм район мәгариф бүлекләре, тарих һәм җәмгыять белеме укытучыларының методик берләшмәләре җитәкчеләре өчен семинар үткәрелде, анда 2026 елгы парламент дәресенә старт бирелде. Ике атна дәвамында, 16-28 февральдә, республиканың барлык мәктәпләрендә һәм урта һөнәри оешмаларында Татарстанда игълан ителгән хәрби һәм хезмәт батырлыгы елына багышланган «Хезмәт һәм хәрби батырлык белән Ватанны данлыйбыз!» дигән парламент дәресләре үткәреләчәк.
Семинар эшендә ТР Дәүләт Советы Секретаре Лилия Маврина, ТР Мәгариф һәм фән министры Илсур Һадиуллин, социаль сәясәт комитеты рәисе Алексей Созинов, Законлылык һәм хокук тәртибе комитеты рәисе урынбасары Ринат Фазылов, ТР Мәгарифне үстерү институты ректоры Людмила Ногманова, КФУның Халыкара мөнәсәбәтләр, тарих һәм көнчыгышны өйрәнү институтының халыкара мөнәсәбәтләр, дөнья сәясәте һәм дипломатия кафедрасы мөдире Андрей Большаков, Музыка театр һәм хореография институты профессоры, А.И. Герцен исемендәге Россия Дәүләт Педагогия университеты, Казан федераль университеты ректораты референты Зилия Явгильдина, Татарстан Республикасы Профсоюзлар федерациясе матбугат үзәге җитәкчесе Ирина Пузакова катнашты. Чараның модераторы булып «Парламент дәресе-2026»не оештыру һәм үткәрү буенча эшче төркемнең җитәкчесе, Мәгариф, мәдәният, фән һәм милли мәсьәләләр комитеты рәисе урынбасары Ирина Терентьева чыгыш ясады.
«Безнең семинар, гадәттәгечә, еллык парламент дәресләренә старт бирә, – дип ассызыклады Ирина Терентьева, – ел саен парламент дәресләре башланыр алдыннан, дәреснең тематикасы һәм методикасы турында фикер алышабыз, иң яхшы тәҗрибәләр белән уртаклашабыз».
Ирина Терентьева искәрткәнчә, «Парламент дәресе» – Татарстан Республикасы Дәүләт Советы, Татарстан Республикасы Мәгариф һәм фән министрлыгы һәм Татарстан Республикасы Мәгарифне үстерү институтының уртак проекты, ул 2009 елдан бирле үткәрелә.
Традиция буенча, Парламент дәресе кысаларында укучыларның иҗади эшләре һәм педагогларның методик эшләнмәләре буенча республика конкурслары үткәрелә. Быел алар 2 февральдән 31 мартка кадәр була. Һәр конкурсны үткәрү турындагы нигезләмәләр Татарстан Республикасы Мәгариф һәм фән министрлыгы боерыгы белән расланды. Сезне һәм укучыларыгызны конкурс чараларында актив катнашырга чакырам, – дип мөрәҗәгать итте Ирина Терентьева педагогларга, – конкурсларга нәтиҗәләр быел апрель аенда ясалачак».
Республика мәктәпләрендә патриотик һәм рухи-әхлакый тәрбия бирү буенча үткәрелә торган чаралар турында Мәгариф һәм фән министры Илсур Һадиуллин сөйләде. «Ел саен парламентта очрашуыбыз һәм уку елы ахырына кадәр уртак чаралар планлаштыруыбыз бик күңелле, – дип билгеләп үтте ТР Мәгариф һәм фән министры. – Парламент дәресе-2026 темасы бик актуаль, ул баланың шәхесен тәрбияләүгә юнәлдерелгән».
Министр билгеләп үткәнчә, бүген Россиянең тарихи хәтерен, хәрби-тарихи мирасын саклау зур әһәмияткә ия. Хәзерге вакытта Бөек Ватан сугышы вакыйгаларын өйрәнү буенча сәгатьләрне арттыру буенча белем бирү стандарты яңадан карала. «Бу тарихыбызның мөһим бите, без моны истә тотарга тиеш, тамырларыбызда – киләчәк чыганаклары», – дип ассызыклады Илсур Һадиуллин.
Илсур Һадиуллин педагогларга мәктәп программасына яңа фән – «Ватанны саклау һәм иминлек нигезләре» кертелүен искәртте, ул тормыш иминлеге нигезләре курсына алмашка килде. Министр Ватанны саклау һәм иминлек нигезләре дәресләре кабинетларын кирәкле җиһазлар белән тәэмин итү буенча федераль программа башлануы турында сөйләде, аның кысаларында 2027 ел ахырына кадәр 878 мәктәп яңартылган җиһазлар алырга тиеш. «Атамасында ук Ватанны саклау темасы чагыла, бу фәнне укытучы педагогның роле көчәя. Бу кеше үзен, җәмгыятьне һәм дәүләтне якларга өйрәтә. Моннан тыш, ул балалар һәм хәрби һөнәрләр дөньясы арасында арадашчы булып тора», – диде ТР Мәгариф һәм фән министры.
Илсур Һадиуллин шулай ук «Тарих» предметы кысаларында республиканың барлык мәктәпләрендә 2025 елның 1 сентябреннән «Безнең төбәк тарихы» курсы кертелүен билгеләп үтте. «Ул укучыларда туган якка карата уңай мөнәсәбәт һәм Россия тарихы белән бәйләнешкә таянып патриотизм хисе тәрбияләүгә юнәлдерелгән», – диде министр.
Казан федераль университетының Халыкара мөнәсәбәтләр, тарих һәм көнчыгышны өйрәнү институтының халыкара мөнәсәбәтләр, дөнья сәясәте һәм дипломатия кафедрасы мөдире Андрей Большаков бүгенге Россиянең төп бурычларын билгеләде. Ул милли тиңдәшлек нигезләре буларак тарихи батырлыкларга зур игътибар бирде, дәүләт төзелешенең төрле дәрәҗәләре, халыкара сәясәтнең заманча чынбарлыгы турында сөйләде.
Семинарда тәрбия эшенә аерым басым ясалды. Яшьләрне патриотик тәрбияләү мәсьәләләрендә заманча алымнар турында А.И. Герцен исем. Россия дәүләт педагогика университетының музыка, театр һәм хореография институты профессоры, Казан федераль университеты ректораты референты Зилия Явгильдина сөйләде.
«Без Ватанга хезмәт итү турында сөйләгәндә, һичшиксез, хәрби батырлыкларны гына түгел, хезмәт батырлыкларын да күз алдында тотабыз», – диде Ирина Терентьева.
Татарстанның хезмәт династияләре турында ТР Профсоюзлар федерациясенең матбугат үзәге җитәкчесе Ирина Пузакова сөйләде.
Казан шәһәренең Яңа Савин районындагы 179 нчы номерлы гимназия директоры Эльвира Наумова Җиңү музеен булдыру аша рухи-әхлакый кыйммәтләрне еллар аша саклап калу тәҗрибәсе белән уртаклашты.
Семинардан соң, ТР Дәүләт Советы Рәисе Фәрит Мөхәммәтшин педагоглар белән очрашты.
ТР Мәгариф һәм фән министрлыгы матбугат хезмәте материаллары буенча
